við mæðgur erum komnar heim af spítalanum. næstu dagar fara mestmegnis í svefn, ég er dálítið eins og draugur eftir spítaladvölina og þarf að ná upp birgðum af blóði og járni. við þyrftum eiginlega að skella upp sýningu af jólaævintýrinu til að nýta þetta veiklulega útlit mitt til hins ýtrasta. er nokk viss um að geta komið út tárunum á hörðustu nöglum með almennri veiklun og aumingjun. úlfhildur stefanía dafnar vel og er til fyrirmyndar í alla staði, utan smávægilegra byrjunarörðugleika við máltíðir. það stendur allt til bóta.
pabbanum heilsast betur, hann náði sér í einhverja foráttu kvefpest og gekk um á sængurkvennaganginum með skurðlæknagrímu fyrstu dagana til að dreifa ekki bakteríum yfir alla nýju einstaklingana. hann er í skýjunum eins og gefur að skilja og dekrar okkur mægðurnar í hvívetna. nýjar myndir af barninu verða settar inn um leið og ég finn út hvernig ég hleð þeim inn í tölvu litla kúts, sem heilsast einnig með ágætum. hann var viðstaddur fæðingu frænku sinnar allt fram að skurði og stóð sig eins og hetja.
ég skrifa upp söguna seinna, styttri útgáfan hljóðar upp á 21 tíma í fæðingu, þar af 10 tíma án inngripa, eftir einn og hálfan tíma af rembingi var reynt að nota sogklukku og síðan skorið þegar ljóst var að barnið vildi hvergi. lái henni hver sem vill þegar einhver kerlingargribba togar í hausinn á manni með drullusokk. ég er sátt við allt ferlið utan þessarar sogklukkutilraunar, ég vissi sem var að hún væri tilgangslaus. *andvörp* svo er maður auðvitað lurkum laminn og lengur að jafna sig á öllu draslinu þegar svona fer. er ægilega glöð með að sjá að maginn á mér lítur núna út eins og ég sé bara komin sex mánuði á leið, hlaupkenndur og með þetta fína örakerfi sem er farið að minna á vegakort.
ég tek á móti útvöldum í heimsóknir, þeir sem vilja komast í þann hóp mega senda sms. formleg frumsýning verður bráðum.
seinni hluti evróvisjón í kvöld, grill og góðmeti hjá flotanum, áfram finnland !
nýjasta útspil meintra félagshyggjuafla í borginni vekur hjá mér litla kátínu. hvernig gjaldtaka á bílastæðum sjúkrahúsa getur verið réttlætt er mér fyrimunað að skilja. ég þarf að nýta mér þjónustu lsh oftar en ég kæri mig um, og get alveg sagt það að ég hef ekki alltaf verið í ástandi til að hökta fram og aftur um lóðina til að borga í gjaldmæla. hvað þá að sjúklingar almennt eigi að þurfa að leggja þetta á sig. nóg er nú samt að finna stæði við stofnunina sem er ekki upptekið af læknajeppum eða öðrum bifreiðum starfsfólks. biðtími á sjúkrahúsi er óskilgreindur, og ef þú lendir í því að þurfa að bíða færðu stöðumælasekt..?! þetta nær ekki nokkurri átt. aukin skattheimta í hverju horni, byggingaverktakaalræði í miðborginni, kröfur um að ég leggi líf mitt í stórhættu á hjóli í umferðinni hvernig sem viðrar...ég er að verða brjáluð á þessu. ég vil losna við þetta lið úr borginni. helst undir þykku lagi af tjöru og fiðri. | fangor 10:50
fimmtudagur, maí 18, 2006
júróvosjón í kvöld, barnið situr sem fastast og ég sé ekki fram á að það láti sjá sig fyrir helgi. það skyldi þó aldrei mæta á tilsettum tíma...? við hjónin sækjum flotann heim í kvöld til að fylgjast með ágústu og félögum. jibbíkóla...
nýja auglýsingin fyrir venus rakvélar gilette hefur eitthvað misfarist hjá auglýsingastofunni sem beinþýddi textann. ég sé nefnilega ekki að það getir verið þægilegt að hafa fótleggi mína glóandi eftir rakstur. það ku vera vont. glansandii, það gæti ég alveg samþykkt. þarna hefur ljóslega komið upp misskilningur á merkingu orðsins "glow" þegar því hefur verið snarað á íslensku. biðla til allra auglýsingavinnumanna sem ég þekki að koma þessu til skila. ég gnísti svo tönnum í hvert skipti sem þessi óbjóður birtist í sjónvarpinu mínu...*snjerg*
óska rússlandsförunum góðs gengis og skemmtunar, hlakka til að heyra ferðasögurnar. | fangor 11:28
sunnudagur, maí 14, 2006
ég er enn með barni þrátt fyrir allar spár um annað. einhversstaðar er pottur brotinn hvað áhrínihæfileika samnorna minna varðar.
sat aðalfund hjá honum hugleiki mínum, fékk þar kosningu í varastjórn og hlakka til að starfa með því prýðisfólki sem situr í öðrum embættum félagsins. vonast til að okkur takist að halda úti jafn kröftugu starfi og í vetur sem leið.
hefur einhver annar en ég tekið eftir sjálfbirgingshættinum í degi eggerts sem kemur fram í kynningunni fyrir sjálfstætt fólk? þar sem hann segist aðspurður ekki þurfa sjálfstyrkingarnámskeið á meðan hann sér andlitið á sér í risastærð rúnta um borgina. sé hann fyrir mér með heilsa sjálfum sér með sjálfsánægðu glotti; "..hey sæti..." í hvert skipti sem rútan tekur upp pláss í miðbænum. enn ein ástæðan fyrir því að ég þarf ekki að velta fyrir mér að veita samfylkingunni atkvæði mitt í þessum kosningum. þykir verra að ég get ekki sæst á neina aðra heldur. þykir þó líklegast að ég kjósi frjálslynda. en þeir vilja hafa flugvölinn í mýrinni áfram, og það vil ég ekki. *andvörp*
síðasta skemmtun hugleiks í kjallaranum í kvöld, það vara hrikalega gaman á þriðjudaginn, verður enn betra í kvöld. mætið þið hauslausu hænur sem hafið skrópað hingað til!
svo ætla ég að sofa, safna kröftum og eiga barn um helgina *áhrín* | fangor 10:17
mánudagur, maí 08, 2006
ek em sólbrennt. íðilfegurð á næsta leiti. það er um leið og ég losna við barnið og bjúginn :þ (óskhyggja...? seiseinei)
tónlistardagskrá hugleiks annað kvöld í þjóðleikhúskjallaranum, skyldumæting. síðasta dagskrá vetrarins og þeir sem hafa hingað til skrópað geta druslast til að láta sjá sig fyrir sumarið. minn ektamaður verður trymminn að vanda og ég ætla að reyna við tommalagið. ég sé reyndar ekki fram á að geta sungið eins og staðan er í dag, næ ekki andanum og held ekki tóni en aldrei að vita. annars verðum við bara að notast við útgáfu toggalitla. sem verður engu síðri.
hvurnig sem fer, það verður gaman. verst að geta ekki skálað við leikfélagana til að fagna lokum þessa stórafrekavetrar. bráðum, bráðum...
ótrúlegt hvernig dagarnir fljúga frá manni. sótti bandalagsþing í gær, fékk fyrirtaks gagnrýni á fyrsta alvöru leikstjórnarverkefnið mitt ( tel ég þá ekki með sýninguna á hárinu sem við unnar geir leikstýrðum fyrir gunna gunnsteins ér um árið ) og verðlaun fyrir að hafa fengið að stýra því. ekki amalegt það, með frábæran þátt, æðislega leikara og ekki annað að gera en segja "já, þið eruð fyndin, gerum þetta" á réttum stöðum. öldungis prýðilegt og við hæfi að monta sig af því sem maður gerir minnst í sjálfur. vér hugleikarar fengum almennt jákvæðar undirtektir við okkar framlögum til margs smás, og er það vel. ekki fengum við þó að sýna jólaævintýrið í þjóðleikhúsinu, kom á óvart..:þ
martini er nú formlega tilbúinn til frumsýningar og ég vonast til þess að hann láti ekki bíða lengi eftir sér enn. ég er orðin eins og bjúgaldin og á afskaplega erfitt með hreyfingar. ætla nú samt að láta á reyna hvort ég get ennþá sungið tommalitla í tónlistarveislunni komandi þriðjudag/fimmtudag. er það reyndar stórlega til efs, andstutt sem ég er en treysti leikfélögunum mínum til að láta vita ef ég stefni í stórslys eins og ólétta konan í júróvisjón. þá er nú betra sleppt en haldið.
ég ætla að hafa auga með formúlnum í dag en yfirlýst markmið eru að hertaka pallinn hennar sigguláru, safna sólarorku og svitna bjúg.
fram þjáðir menn í þúsund löndum og svo framvegis.
eyddi þessum baráttudegi verkalýðsins í sundi, kaffiboðum og almennri leti. hugsaði þó sterkt um það hversu ömurlegt stéttarfélag vr í rauninni er, sem gaf eftir frírétt félagsmanna á sjálfum baráttudegi verkalýðsins. og reyndar öll önnur hátíðisdagafrí líka. húrra fyrir þeim.
svo nenni ég ekki meiri pólitískum hugleiðingum, ég ætla í matarboð. | fangor 17:56
