netsamband heimilisins óvirkt í 2 daga og heimurinn er á heljarþröm. varríus útþurrkaður og upprisinn, einkatölvupóstur fólks gerður upptækur hjá hefnigjörnum sneplum, lægðir sitja um landið. til að kóróna allt saman hef ég fengið æluna.
ég er búin að æla lifur og lungum síðan 9:30 í morgun. vissi ekki að líkami minn innihéldi slík í svo miklu magni en svo lengi lærir sem lifir. ég þurfti að hætta í vinnunni rétt upp úr eitt, gagnsleysið var algert. morgunógleði minn rass. ef þetta er það sem koma skal næstu vikurnar er ég hætt við. ég þarf að setja upp leikrit! | fangor 18:52
við hjón fórum og samlásum nýja hugleiksstykkið ásamt fríðum flokki. það er hið prýðilegasta og mér sýnist allt stefna í stórskemmtilega sýningu. konunni með grindverkinn hafa hripast niður skemmtilegheit og fynd, megi þau magnast og verða fleiri. ég hef ekki farið á samlestur síðan...tjah. ég held svei mér ekki síðan í stræti hér um árið. fann fyrir gamalkunnum fiðringi og langar meiraðsegja í ákveðið hlutverk. sem þýðir auðvitað að ég verð að fá dramakast ef ég fæ það ekki. samkvæmt hefðinni.
í óskildum fréttum hefur jón geir selt sál sína erlendu plötufyrirtæki ásamt þeim ampoppurum. erlendir plötusamningar eru...tjah...stórmerkileg fyrirbrigði. lesa smáa letrið. sem er reyndar útskýrt afþví að þetta er breskur samningur. td: "svæðið; hér er átt við allan heiminn." þetta er samningur um útgáfu á smáskífu, heimsyfirráð eru ekki alveg á næsta leyti til að fyrirbyggja allan misskilning. en skilar kannski einhverju. einhverntíman.
svavar vann trúbadorakeppnina. sem er frábært. eeeen... hljómsveitin hraun er bókuð á rósenberg í kvöld og annað kvöld. í kvöld verður hefðbundin tónleika-partýstemming og ammlisittingur litla kúts. annað kvöld hins vegar...þá verður svavar á neskaupsstað. hraun hefur spilað í ýmsum útgáfum, en aldrei án svavars. það verður því tilraunakvöld, opin söngbók, laus míkrófónn og allir vinir og velunnarar sveitarinnar eru hvattir til að koma og taka lagið. hvern hefur ekki dreymt um karókí með hljómsveit? (öðru nafni ædol-keppni..)
semsagt: laugardagskvöldið 24. september er öllum boðið að mæta og syngja með gleðisveitinni hraun. söngbók verður á staðnum. (undanskilin verða lögin stál og hnífur,minning um mann og house of the rising sun. verði brögð að því að fólk geri tilraunir í þær áttir áskilur sveitin sér rétt til að varpa viðkomandi á dyr)
annars er fyrir mestu að hafa gaman. hverjir þora?
litli leikarakútur á ammli í dag. hann er 25. ára. töttögofemm! það þýðir bara eitt; ég nálgast þrítugsaldurinn óðfluga.
ég ætla að reyna að fara út annað kvöld, þ.e að mæta á rósenberg gigg hjá hraun. þeir sem eiga eftir að bera sveitina augum eru hvattir til að láta sjá sig snemma til að heyra frumsamda efnið áður en kvöldið er leyst upp í vitleysur. | fangor 16:22
samkvæmt hefðinni er flöskudagur í dag. ég þarf að finna eitthvað sniðugt til að setja á flöskurnar, áfengi ku illa séð með ástandinu.
ásta og ástþór ( mikið er þetta óþægileg nafnaröð..) klukkuðu mig. og ég sem vissi ekki einusinni að ég væri í leik.
1. ég nota barnastærð 35 af skóm. (þetta eru reyndar mjög praktískar upplýsingar ef einhvern skyldi langa að gefa mér skó) 2. mér fannst svo gaman í disneyworld að ég ætla þangað aftur. 3. mér finnst gaman að veiða marhnúta. 4. mér finnst rigningin góð. 5. fyrir langa löngu safnaði ég fílum. ( þessum með ranann, ekki ý-i)
þar höfum við það. heimurinn er sjálfsagt bættari fyrir vikið. | fangor 18:07
fimmtudagur, september 15, 2005
kalli og sælgætisgerðin:
tjah. jújú. svosem. flott umhverfi, litir og gleði. kalli og fjölskylda alveg ljóslifandi af síðum bókarinnar, innvols verksmiðjunnar svona nokkurnvegin eins og maður hafði ímyndað sér. skemmtilegar senur úmpalúmpa þó að ég hefði persónulega þegið aðeins fleiri andlit.
myndin verður áræðanlega vinsæl og selst vel, gæti fengið költ-status en ég efast samt. johnny depp er snillingur, en ég hef alltaf litið á willy wonka sem frábærasta mann í heimi sem býr til nammi af tómri gleði og hamingju. ekki sem wacko-jacko-klón með fjölsylduvandamál, það fer alveg verulega mikið í taugarnar á mér. það er óþarfi að bæta við söguna, hún hefði nú varla verið svona vinsæl hefði dahl gamli klúðrað einhverju í uppbyggingu hennar. ég skil eiginlega ekki alveg hvers vegna þurfti að fara þessa leið til að ná fram sáttum ww við föður sinn, það hefði alveg mátt leysa það öðruvísi. fyrir utan það að samkvæmt þessum endi er ekkert meira með þeirra samband hvort eð er..? óþarfa bull segi ég nú bara.
myndin er skemmtileg. það vantar ekki. ég bara..veit ekki alveg með hana ennþá. vildi óska þess að þeir hefðu sleppt viðbótinni í endann, þá hefði ég ekki yfir neinu að kvarta. | fangor 18:07
miðvikudagur, september 14, 2005
tada...:
tilvist martinis hefur verið staðfest. þá er bara að halda áfram að bæta í hann bragðefnum og vona að hann haldi sér sem fastast. fer í sónar eftir 2 vikur til að athuga hvort hann sitji enn. so far, so good.
ég gleymdi að fara á margaret atwood á bókmenntahátíð og er það ti háborinnar skammar. það er af sem áður var. hef ekki menningarsnobbast neitt á þessri bókmenntahátíð, ég sá meira í á listahátíð reykjavíkur um árið. mætti á opnanir og svona. sennilega er þetta vegna þess að ég vil ekki láta minna mig á það hvað er stutt eftir í ba-gráðuna mína;þ
á ég að hætta mér til grindavíkur til að kenna unglingum að lemja rusl? það er stóra spurningin. guðbergur sagði að þar byggi bara dáið fólk. í minni bók er enn enginn grindvíkingur sem er ekki stórlega skaddaður á geði. maður á svosem ekki að dæma börnin af feðranna syndum, en samt..? skilst reyndar að um hóp af stúlkubörnum sé að ræða sem er skemmtilegt verkefni í sjálfu sér. við jg getum kannski myndað fyrsta stelpuslagverksband landsins sem væri góðra gjalda vert. en þá verð ég sennilega að reka jón:þ
ég byrjaði að vinna í dag, verð við klæðasölu hjá dressmann í musteri mammons. þeir sem eiga leið um þann stað mega endilega stinga inn trýni og kasta á mig kveðju eða tveim.
hef planlagt að bregða mér og fleirum í kvikmyndahús til að sjá kalla og sælgætisgerðina í meðförum tim burton. hef ákveðið að samsetningin dahl-burton-depp geti ekki klikkað. sjáum til.
ég bætti við nýjungum hér til hliðar: letihaugum verður hent út eftir 2 vikur hafi þeir ekki bætt ráð sitt. fluguveggurinn samanstendur af nokkrum af þeim bloggum sem ég hef les reglulega. listinn er reyndar talsvert stærri en ég nenni ekki að vera með endalaust af linkum, ég uppfæri hann frekar reglulega.
flekka er komin af fjalli, tvílembd þetta árið og ágætlega í holdum. ekki bólaði á vaninhyrndum hrút.
þá eru foreldrarnir flognir. við jón geir litum við í grafarvoginum í morgun til að fylgjast með formúlnum og éta leifar úr skírnarveislu. var það hið ánægjulegasta í alla staði, utan tilraun japanska heimsveldisins til að gera út af við þýska eðalstálið sém átti loksins von á sæti.
ég var að ljúka við frábæra bók: colors insulting to nature. þetta er ein allra skemmtilegasta en jafnframt erfiðasta þroskasaga táningsstelpu sem ég hef nokkurn tíman lesið. hún er erfið vegna maður fylgist með söguhetjunni vaða út í hverja katastrófuna á fætur annari og tárfellir af aulahrolli á meðan maður minnist þess hvernig þessi tími fór með sjálfið og aðra í kring. hún er skelfilega sönn. og hrikalega svört, íronísk og beitt í ádeilunni á drauminn um Frægðina. mæli eindregið með þessari lesningu, ógleymanlegir karakterar og skemmtilegt spark í andlitið á öllum sem láta sig dreyma um að meika'ða svo að lífið öðlist tilgang.
síðustu 2.dögum hef ég eytt í samvistum við foreldrana sem gerðu sér ferð til höfuðstaðarins. faðir minn til rannsóknardvalar en móðir mín til þess að þrífa skítinn undan leiklistarnemanum. það tók sólarhring. hrmpf. yfir vorn dauðan búk skal ég á gamals aldri fljúga milli landshluta þegar ég á frí frá vinnu til þess að taka til í herbergjum erfingja minna.
í óskyldum fréttum er orð vikunnar komið úr smiðju braga valdimars orðsmiðar og málfarssnillings: "fimbulglópur". krafturinn og fegurðin í þessu orði er hreint með ólíkindum. prófiði bara að nota það í setningu.
ég hef ákveðið að virkja nornakrafta mína og flýta klukkunni um tuttugu mínútur.
hvernig væri nú að vinir og vandamenn færu að klára að skrifa leikrit svo ég geti farið að mæta á samlestra og leikæfingar? það haustar og ég hef ekki leikfélagast að ráði síðan í draumnum hér um árið. ekki laust við að ég sé komin með alvarleg fráhvörf.
það er einföld staðreynd að mann langar miklu meira í hlutina þegar maður má ekki fá þá. siggalára lýsti yfir fylleríisáformum sínum þegar árið er liðið. hvað ég skil hana vel. mig langar í ótæpilegt magn af kaffi, nikótíni og dýrum rauðvínum ásamt súkkulaði, jarðaberjum og öðrum lystisemdum. síðarnefndu hlutina má ég reyndar borða, í hófi. þessi yfirþyrmandi löngun í óhollustu hefur sennilega eitthvað að gera með það að næstu 3 daga ræðst hvort martini tekur sér bólfestu eða siglir sömu leið og aðrir kokteilar. ekki það að ég fæ ekki að vita neitt fyrir víst fyrr en fjórtánda og þá þarf að fylgjast með hvort framhald verði á tilvist hans. sem er eins mikið happa/glappa og hjá hverjum öðrum og tekur 12 vikur að verða nokkuð öruggt. á meðan þarf maður að lifa eins og syndlaus kona og "fara vel með sig". sem þýðir að ég get ekki gert nokkurn skapaðan hlut án þess að fá hugsanaásóknir um hvort ég sé nú að gera eitthvað sem gæti verið óhollt, skemmt eitthvað..ble og bla. eins og börn hafi ekki fæðst árþúsundum saman þrátt fyrir að mæður hafi ekkert um þeirra tilvist vitað fyrr en löngu eftir festingartíma, reykt drukkið og dópað eins og svín og allt verið í fínu lagi. ég fæ órökrétt móðursýkisköst 4 sinnum á dag ( athyglivert það, ég hef nefnilega hingað til aðeins fengið rökrétt móðursýkisköst...;þ ) og almennar geðbólgur aukast jafnt og þétt.
það er eitthvað algerlega óþolandi við það að sitja og bíða vitandi það að jafnvel þó að ég lægi með lappirnar upp í loft og kyrjaði frjósemissöngva, brenni nornakertið og mundi brúðuna sem spunkhildur galdraði fyrir mig eru um það bil fjörutíu prósenta líkur á því að allt gangi upp. ég má ekki neitt, engin vinna, engin líkamsrækt, ekkert álag ekkert þetta og ekkert hitt. ég sit bara og geng hægt og rólega af vitinu.
ef ég var þá ekki löngu búin að ganga framhjá því. | fangor 15:05
