ég bíð spennt ásamt nábúum mínum eftir viðbrögðum skipulagsnefndar við athugasemdabréfinu sem við sendum inn til mótmæla fyrirhuguðum framkvæmdum hér við hliðina. ég fékk upphringingu frá dv í dag, svo einhver hefur tekið eftir athugasemdunum. á reyndar eftir að sjá hvernig þeir höndla þessa meintu frétt, ég vildi ekki hleypa þeim inn til að taka myndir af útsýni eða af okkur til að nota með fréttinni, ég sé einhvernvegin fyrir mér fyrirsögnina "ófrísk kona hrekst af heimili sínu..." og nenni ekki að standa í þeim pakka strax. ef hins vegar ekkert mark verður á okkur tekið gríp ég til allra ráða, þó að það þýði viðræður við dv. það verður bara að koma í ljós. samskipti mín við aðrar stofnanir sem ég hef þurft að eiga við undanfarið hafa verið með slíkum ágætum að ég er farin að fyllast grunsemdum um að sá kvóti sé búinn. þegar maður fær prýðisþjónustu auk óumbeðinnar aðstoðar frá ríkisskattstjóra og vinaleg bros frá afgreiðslu tollstjóra er eitthvað dularfullt á ferð. tryggingastofnun vill allt fyrir mig gera... ég er viss um að skipulagsnefnd bætir fyrir þetta með því að hundsa allar athugasemdir.
nú eða himnarnir hrynja.
bendi lesendum á að skoða myndina sem ylfa linkaði inn í athugasemd við síðustu færslu. ég vona að þetta verði ekki raunin, en ég sagði mig á sósíalinn í dag sökum óléttu og það eru tólf vikur eftir. ég segi nú bara eins og konan hér um árið: ííííík! | fangor 19:49
laugardagur, febrúar 25, 2006
stympnir hafa orðið og voru undirtektir með eindæmum góðar í húsi hafnarinnar. verður framhald á samstarfinu.
raritet mín ástkær átti ammli í gær, og ég gleymdi að óska henni til hamingju. hún fær því ammliskveðjurnar í dag; innilega til hamingju sætust og skemmtu þér vel í höfn kaupmannanna. ég vonast til að hitta hana yfir uppbótarkaffi fljótlega. svona áður en ég verð of ólétt til að geta hreyft mig, þess er ekki langt að bíða. með þessu áframhaldi get ég toppað myndina hennar ylfu og er þá mikið sagt.
við jg verðum með stutt stompnámskeið fyrir börn á ldrinum 10-12 ára í laugalækjaskóla á morgun, tilefnið er alheimsdagur barna. þetta verður hin skemmtilegasta dagskrá með alls konar vinnusmiðjum, svo ef þið þekkið börn á þessum aldri sem langar að prufa eru þau velkomin, byrjum kl 1:30 að skrá á námskeiðin, fyrstir koma fyrstir fá reglan þar í gildi. | fangor 14:12
fimmtudagur, febrúar 23, 2006
ég er enn á lífi. og merkilegt nokk, sama á við um þjónustufulltrúa símans sem kippti nettenginu heimilisins í lag á mettíma. öfugt við þjónustustúlku satans frá sama fyrirtæki sem reyndi í gærkveldi að telja mér trú um að vandræði við nettenginguna stöfuðu af torkennilegum málmhlutum sem skyndilega hefðu vaxið í veggjum hússins. "jú, það er sko oft þannig í svona gömlum húsum sko þúst.." hún var heppin að ég náði ekki til hennar. legg ég á og mæli um að tenging haldist nú til friðs næstu mánuðina *áhrín*.
stympnir hittast til æfinga í kvöld og á ég von á skemmtan bestu. svo er um að gera fyrir alla að rölta við í hafnarhúsinu annað kvöld og klappa fyrir okkur, afþví við erum svo sæt þó ekki væri annað.
mig laangar svo til útlanda. sól, hiti, sjór til að baða sig í, matur á skynsamlegu verði, rauðvín í lítratali, (líka á skynsamlegu verði) markaður með fersku grænmeti á næsta götuhorni.....*dreymið andvarp*
fékk svona heiftarlega sumarþrá í sveitaferðinni þar sem við keyrðum framhjá manni sem var að dreifa skít á túnin hjá sér. í miðjum febrúar. afþví að það er farið að grænka. þetta er náttúrulega ekki nokkur hemja... | fangor 18:38
sunnudagur, febrúar 19, 2006
komst að því að sveitin hans lofts er hin ákaflega áferðarfalleg. gistum í góðu yfirlæti á sandlæk í gnúpverjahreppi yfir helgina. þorrablót var tekið með trompi þó einhverjum hafi ekki þótt við hæfi að heyra jólalag. hvað þá einhver leikskólalög, en það er jú alltaf húmorslaust fólk á hverjum stað, og hinir 230 skemmtu sér hið besta að okkur sýndist. ég skellti mér upp á svið og trallaði raddir og hristi dót í takt við drengina mína, martini hefur þá troðið upp á sínu fyrsta sveitaballi tæplega 27 vikna gamall og geri aðrir betur.
hlakka til að fá ástu heim þó ég verði án efa græn af öfund þegar ég sé sólbrúnkuna og heyri alla ferðasöguna. er farin að sjá fyrirhugað sumarfrí í hillingum, við ætlum að fara til spáns með martini í ágúst ( ef guð lofar ) og dvelja lengi, 3.vikur helst. fáránlegt til þess að hugsa að það sé ódýrara fyrir okkur að fljúga út og vera þar í þrjár vikur en að dvelja heima með barnið í jafn langan tíma.
reyni að ná saman áhugahóp fólks um aukna hrynvitund fyrir giggið á föstudagskvöldið komandi, svona rétt til að slá okkur saman. fyrir þá sem áhuga hafa er rétt að benda á að við verðum í hafnarhúsinu á safnanótt, kl.8.15 og aftur um hálftíu. einn, tveir og..stomp! | fangor 20:29
lífið fer í stóra hringi. jg er að fara að taka upp plötu með trössunum um helgina. fyrir óinnvígða er það þungarokkssveit sem ég hlustaði á þegar ég var 14-15 ára af mikilli áfergju og var starfrækt frá alþýðuskólanum á eiðum heitnum. þykir mér þetta hið sniðugasta í alla staði.
ég var að hugsa um að sækja sveitaþorrablót á laugardaginn með drengjunum mínum í hraun en sýnist á öllu að best verði að halda sig innan dyra með sæng og kakóbolla. | fangor 16:25
mánudagur, febrúar 13, 2006
er aftursnúin úr bílferð dauðans vestur á firði. hef átt í samskiptaörðugleikum við blogger sem virðist hafa gengið í lið með stofnunum landsins til að gera mér lífið leitt. það var ósköp gott að fara vestur í kyrrðina, athöfnin var ákaflega falleg og gaman að hitta stórfjölskylduna alla samankomna. ég náði að sjá framan í frú ringsted og tuma mág minn á langa manga, var það hið besta mál. legg þó ekki á mig frekari bílferðalög yfir klukkutímalengdum fyrr en eftir barneign, er algerlega búin með batterín og fékk skammir fyrir frá ljósmæðrunum mínum í dag.
sit eins og límd við sjónvarpið yfir lost, tími engan vegin að horfa á þættina í tölvu þrátt fyrir að litli kútur hafi hlaðið fyrstu tólf þáttunum inn í kjölturakkann minn. einhvernvegin finnst mér leiðinlegt að horfa á sjónvarpsþætti í tölvu, alveg eins og mér finnst að lesa bækur í tölvunni. ég er sennilega svona afskaplega gamaldags þegar kemur að þessum hlutum. eins og ég er nú lítið gamaldags þegar kemur að öðrum.
ég er að íhuga að senda skipulagsnefndarfólkinu kúk í pósti. | fangor 22:47
miðvikudagur, febrúar 08, 2006
það er ekki leggjandi á óléttar konur að þurfa að rífast við fólk í opinberum embættum. ég skil svo afskaplega vel hvers vegna fyrrverandi starfsmenn bandarísku stjórnsýslunnar flykkjast á sína gömlu vinnustaði með vopn við höndina. ef forsíðan á dv á morgun verður "ófrísk kona tekur skipulagsnefnd í gíslingu" látið ykkur ekki bregða. mér þykir ekki líklegt að ég verði neinum að fjörtjóni. ekki ennþá. *gnístr* | fangor 11:39
sunnudagur, febrúar 05, 2006
lenti óvænt á árshátíð félags húseigenda á spáni í gærkveldi. fengum prýðisgóðan mat og gistum í ágætis yfirlæti á hótel örk. ekki laust við að fjölskyldan lækkaði meðalaldur samkomunnar um allnokkur ár, flestir félagsmenn komnir yfir sextugt að mér sýndist þó auðvitað hafi ekki allir mætt. yfir máltíðinni var hinn ofurkáti ómar ragnarson með skemmtidagskrá, hún tók um tvo og hálfan tíma og geri aðrir betur segi ég nú bara. ótrúlegt úthald sem maðurinn hefur, eftir þetta var hann með boxlýsingu á sýn fram eftir nóttu. ég vona að ég verði svona hress komin á sjötugsaldurinn.
Ástkær langamma mín, Frú Ingunn Angantýdóttir lést í gær 96. ára að aldri. þar fór mikil heiðurskona og verður hennar minnst með mikilli hlýju af þeim sem svo gæfusamir voru að kynnast henni. við jón geir förum vestur til að vera við jarðarförina næskomandi laugardag. fyrst þurfum við þó að skjótast á grundarfjörð til að vera með stompnámskeið svo það er spurning hvort við keyrum þaðan vestur, tökum baldur yfir breiðafjörðinn og keyrum fallegu leiðina yfir heiðarnar. vonumst svo til að það verði fært þá leiðina heim aftur. | fangor 15:43
við skulum svo endilega halda áfram að berjast gegn reykingum á kaffihúsum sem fólk getur valið sér að stunda. afþví að það eru gefnar út viðvaranir þegar tóbakreykur fer yfir ákveðin mörk er það ekki, og það sparar milljónir á ári í gatnagerðarkostnað líka, ha, hmm..
ég er að horfa á stúlkurnar á leikdrengjasetrinu. það er bara hörkuvinna að vera kærasta manns á áttræðisaldri. | fangor 00:03
föstudagur, febrúar 03, 2006
ég ákvað að nenna ekki stofnanaflakkinu í dag. ætla að nota mánudag til þess, hann er hvorteðer ætlaður til mæðu.
foreldrarnir litu inn, þau eru að fara á árshátíð í hveragerði um helgina. ég er búin að senda alla strákana mína í spilamennsku víðs vegar um heiminn svo ég ligg ein heima hjá mér yfir ædolinu í kvöld, ef einhvern langar í heimsókn er það gvuuuðvelkomið. og vel þegið.
er annars að fara yfir um af hneykslan vegna fyrirhugaðrar lagasetningar gegn reykingum sem á að keyra í gegn um þingið undir yfirskini vinnuverndar, fasistaríkið ísland þokast nær og nær. hegðun múslimskra mótmælenda fer endalaust í taugarnar á mér, ég get ekki séð hvernig fánabrennsla og sendiráðsníðsla á að styrkja málstað fólks sem berst gegn tjáningarfrelsi annara ríkja. ég finn hvernig fordómaöldurnar stækka og flæða yfir samfélög "siðaðra" þjóða. það var nú akkúrat það sem við þurftum var það ekki.
ég hlakka endalaust til að sjá svandísi mína og hana heiðu rachel. ylfu sendi ég samúðar- og baráttukveðjur með óskum um að hlutirnir fari nú að ganga betur hjá slektinu. | fangor 17:15
fimmtudagur, febrúar 02, 2006
það ríkir almennt andleysi yfir heimilinu. ég held því fram að þetta stafi af því að síðustu daga hef ég horft á boltaleiki í sjónvarpinu mínu og eins og allir vita er slíkt heiladrepandi fram úr hófi.
rokkstjarnan flýgur til parísar í nótt og snýr aftur á laugardaginn. vonast til að hann fái aðeins að líta borgina augum fyrst hann er nú að fara á annað borð.
trymmnir munu safnast saman á sunnudag ef hægt er til að spinna upp hrynverk fyrir safnanótt, verð í sambandi við hlutaðeigandi ef af verður.
ég er komin með feituna sem siggalára er að losna við, þykir oss það mál hið versta. verð orðin eins og sundbolti með lappir innan skamms ef svo heldur sem horfir.
á morgun bíða mín samskipti við tryggingastofnun, ríkisskattstjóra og skipulagsnefnd reykjavíkurborgar. bara tilhugsunin kallar fram taugalífeðlisfræðileg viðbrögð af versta tagi. *andvörp* | fangor 18:32
