jæja, pistill gærdagsins var étinn af netskrímslinu. alveg klassískt þar sem hann var það eina sem ég hef skrifað af viti svo mánuðum skipti. styrkir það trú mína á því að betra sé að halda sig við upprunalega stefnu og blogga ekki neitt af viti og sleppa pólitískum pistlum.
enn fékk ég staðfestingu þess að fólk er almennt fífl; heyrt í heita pottinum í morgun: " ja, ég meina að troða þessum háskóla þarna í sveitina á bifröst, þetta gengur ekkert fyrir fólk með fjölskyldur- en þetta er víst rosalega vinsælt hjá einstæðum mæðrum, þær hafa leikskóla og allt fyrir börnin á staðnum og svo er þetta svo mikill félagsskapur fyrir þær" hló minn innri púki. var að hugsa um að skrifa rektor bréf og þakka fyrir hönd einstæðra mæðra þessa tilraun til að bjarga félagslífi þeirra. næstir mættu tveir karlmenn á fertugsaldri með kríuskít í hárinu: "afhverju er alltaf verið að tala við þessar konur, ég meina þessi vigdís var bara að gróðursetja tré og það er ekkert um að konur séu í entrepreneur hérna, byggja ekkert frá grunni nema akannski eitthvað tískudót" hér er orðið of mikið af hálfvitum hvæsti ég og strunsaði upp úr.
á svona dögum langar mig til að vera með augnarráð sem drepur. og leyfi mér að fullyrða að heimurinn yrði betri eftir. | fangor 18:50
laugardagur, október 22, 2005
ég átti hræðilega söngæfingu í dag, sé fram á að kraftaverk þurfi að gerast ef röddin í mér á að berast um allan salinn með þeirri angurværð og ægifegurð sem lagið krefst. held að við þurfum prufa að breyta aftur um tóntegund, hljómsveitinni án efa til mikillar gleði.
plan þessa kvölds er svipað og gærkveldsins. sama dagskrá á rósenberg, hvet alla til að mæta klukkan 10 og hlusta á vox fox sem er þrælskemmtilegur raddkvartett. fjölbreytt lagaval og frábær flutningur hjá þeim. vonandi er fabúla betri af veikindunum og svo hún verði með í dagskrá kvöldsins.
um hálfeitt ætla ég svo að trítla ásamt mínum ektamanni sem samkvæmt grapevine er þungamiðjan í ampop ( ég er reyndar hjártanlega sammála þeim með það ;þ ) á þjóðleikhúskjallarann. ég skal verða vakandi, ó já.
[líkurnar á því eru reyndar hverfandi þar sem ástand hefur þessa andstyggðar síþreytu í för með sér. akkúrat í bili stefnir í að ég sofni fyrir framan sjónvarpið upp úr tíu. svei því alla daga *þvuh*]
plan kvöldsins:<br> sofa fram að ídoli. eftir það trilla á rósenberg á off-airwaves festival. þar verða í boði voxfox, fabúla, santiago og okkar eigins snillingar í hraun verða rúsínan í pylsuendanum. vinum og kunningjum er auðvitað skylt að mæta. ég skal afsaka þá sem fara á architecture in helsinki og juliette lewis svona rétt á meðan en ætlast til að sjá smettin á þeim fyrir/eftir þau gigg.
annað kvöld eru svo ampop á þjóðleikhúskjallaranum kl 01:10. þar verða auðvitað allir að mæta. sjálfantil. | fangor 17:52
fimmtudagur, október 20, 2005
það er náttúrulega bara skandall að setja tvö í einu...
You Should Get a MFA (Masters of Fine Arts)
You're a blooming artistic talent, even if you aren't quite convinced. You'd make an incredible artist, photographer, or film maker.
airwaves akkúrat hafin. tilviljun? held ekki....:þ | fangor 11:13
þriðjudagur, október 18, 2005
"þar er líka líf" stóð í leikritinu um ánamaðkinn sem vildi standa uppréttur. það er sitthvað, asni eða fífl. þó að vissulega geti einstaklingur búið yfir eiginleikum beggja.
heimilið hefur verið netsambandslaust síðustu daga en við sjáum fram á bjartari tíma í þeim efnum.
æfingar á jólaævintýri halda ótrauðar áfram og miðar vel. mig vantar dálítið upp á orkubirgðirnar til að gott geti talist, bíð spennt eftir meintu orkuflæði sem ku eiga að fylla æðar óléttra kvenna eftir fyrsta þriðjung. kæmi mér þó ekkert á óvart að það reyndist enn ein bábiljan og fáránleikafullyrðingin gerð til að telja konum trú um að ástandið sé æði. mig er jafnvel farið að gruna að sumt af þessari vitleysu sé samið af konum sem í blindri afneitun reyna að telja sér trú um að allt sé frábært, svona eftirá hafi þetta nú verið bara dásamlegt, og allt þess virði. ég skal þó játa að ég verð ósköp fegin ef satt reynist. | fangor 11:35
laugardagur, október 15, 2005
þriggja tíma söngæfing að baki og ekki ber á öðru en skemmtilegheitum. að öðrum ólöstuðum held ég að þetta sé jafnglaðasti leikhópur sem ég hef æft með.
hin prýðilegasta mynd er að komast á tónlistina og ég held að óhætt sé að lofa væntanlegum áhorfendum því að þeir muni koma trallandi og glaðir af sýningu sem er akkúrat það sem fólk þarf á að halda í jólageðveikinni. vel að merkja er hún byrjuð í ikea, hagkaup og rúmfatalagernum og svei því bara. hvað gengur fólki eiginlega til? ég er bara fegin að vera ekki barn í dag og þurfa að bíða hátt í 3 mánuði eftir jólunum.
partý á eyjaslóðinni í kvöld, hverfissamtök óléttra kvenna verða á staðnum og leika við hvurn sinn fingur. | fangor 19:24
fimmtudagur, október 13, 2005
veröldin er að koma í ljós undan grænslikjuðu horskýinu og er það vel. það er nefnilega ekki hægt að gera annað en að dorma með hita og hor. nú viðrar til lesturs, ég er að klára Ilium og Olympos bíður. Dan Simmons er mikill snillingur og er óhætt að mæla með lestrinum fyrir staðleysuaðdáendur og áhugafólk um hómerskviður.
mig langar annars í þessa bók. sá sem færir mér hana á silfurfati skal verða afrakstursins aðnjótandi.
þessari bók hef ég beðið eftir í að verða 4. ár. það er eins hollt að hún verði góð!
ég vonast til að skríða út úr húsi í kvöld til að hitta leikfélagana mína aðeins. | fangor 16:06
þriðjudagur, október 11, 2005
hóst..snörl..slef..ojbjakk. lífið er tík og síðan deyrðu, sagði merkur maður. ég hallast æ meir að því að hann hafi haft rétt fyrir sér.
ég er komin í karakter hvað lungnastatus varðar. þá er bara að koma sér upp krabbameini í fótinn og stanislavski mun hringsnúast í gröfinni af hamingju.
í kjölfar kuldans vestur á fjörðum hefur lungnakvef og ennisholubólga sest að í líkama mínum sem er öldungis hreint frábært þar sem ég má hvorki nota lungna-né nefsterana mína sökum ástands. hætt við því að söngæfingar verði kraftlitlar næstu daga, og svei því bara.
fór í ástandsmynd í morgun og leit allt vel út, 8 vikur að baki og aðeins 4. eftir í teoretískt öryggi.
mér var boðið í kjúklingasúpu í kópavoginn, hún bragðaðist með eindæmum vel. litla kisukrílið mitt vex og dafnar og það var með semingi sem ég skildi hana eftir í móðurhúsum.
ætla að vefja mig inn í sæng og þamba te í veikri von um að bannfæra pestirnar. svo ég vitni nú í snillinginn hana evu: "veikt fólk á ekki að vera ólétt og ólétt ekki að vera veikt". skál fyrir því. | fangor 22:09
laugardagur, október 08, 2005
umlukin hvítfextum fjöllum skelfur maður úr kulda. vestfirðir eru fyrir alvöru fólk og enga eymingja, sagði skáldið. ég gleymdi að taka með lopasokkana og hin fögru fermetrafjöld mágs míns eru vægt sagt skelfilega illa einangruð. brrr.*skjálf*
við hjón litum við í bolungarvík og þáðum dýrindis kaffiveitingar hjá húsfrú ringsted. *smjatt*. vel gæti ég hugsað mér að gera það oftar. verst að víkin er heldur úr leið af vesturgötunni.
kvöldið lofar góðu, upphitun á langa manga með rólegheitagiggi og svo annað ball í krúsinni. ylfa hefur boðað komu sína svo mér ætti ekki að leiðast, og minni hætta á að eyru mín fyllist af vestfirsku rónaslefi. það er stórmínus við það að hætta að reykja að vopnum mínum til að berja af mér óþolandi pakk á böllum hefur fækkað. ef maður passar sig að vera með logandi sígarettu og bera hana umsvifalaust fyrir þegar eitthvurt viðrinið gerir sig líklegt til að tjá sig í of mikilli nálægð við hlustirnar fækkar blautum eyrum í beinu hlutfalli við sígarettuglóðina...
á æfingu kvöldsins þurfti ég að dusta rykið af kórdrengjasópraninum sem hefur staðið ónotaður árum saman. eitthvað er nú farið að slá í hann og þarfnast æfingar við ef vel á að vera. verst að engin er dr.tóta til að framkalla fögur hljóð. það hlýtur þó að bjargast allt saman. það gleymdist bara að segja mér frá því að raddböndin verða líka ólétt, og bregðast skringilega við notkun. ég vona bara að mín sjái sér leik á borði og fegri öll hljóð sem úr þeim verða kreist á næstunni.
stefni á vesturferð um helgina ásamt hraunverjum. | fangor 23:50
þriðjudagur, október 04, 2005
ja nú þykir mér týra. þeim hugleikurum fannst vel til fundið að setja mig í hlutverk tomma litla í jólaævintýrinu mikla. ( tiny tim fyrir óinnvígða). ég hef aðeins tvennt við þessa skipan að athuga: a) ég var prýðilegur 8.ára drengur fyrir 10 kílóum og 3 brjóstahaldarastærðum síðan eins og ljóst varð í cloud nine hér um árið. útlit mitt í dag gefur ekki beint til kynna að ég þjáist af tæringarsjúkdómi. samkvæmt mínum spegli að minnsta kosti. það væri þó vissulega gaman ef í ljós kæmi að speglar og vigtir heimsins hefðu gert með sér samsæri gegn mér og ég væri í alvörunni ennþá 47 kíló.
b) ég mun ekki klippa af mér hárið. hef ég varríus grunaðan um ágirnd á hárinu mínu síðan í draumnum og hafi það ráðið einhverju um skipan þessa. honum verður ekki kápan úr því klæðinu, ó nei.
jón geir fékk hlutverk friðriks frænda og ebenezers á yngri árum. sem er hið besta mál. prýðisfólk í hverju rúmi öðru og stefnir í hina bestu skemmtan á æfingatímabili sem sýningum.
næstu vikur fara því í að finna minn innri kryppling og áframhaldandi ræktun kokteils. (ég vona bara að þeir sameinist ekki.. :þ) | fangor 18:53
laugardagur, október 01, 2005
svo fréttum af búksorgum vorum sé nú áfram haldið tel ég liklegt að ælan mikla hafi verið flensuættar einhverskonar, er hún á hröðu undanhaldi þó að mér liði ennþá eins og undinni tusku eftir átökin. (7,9,13)
hlýtur það að teljast til góðra frétta og ég mun eyða deginum í að safna kröftum fyrir komandi viku. jg flýgur út á morgun til að öðlast heimsfrægð og kemur ekki aftur fyrr en á miðvikudagskvöld. af þvi leiðir að ég þarf að vera lengur í vinnunni en vanalega sem gæti orðið dálítið snúið haldi ælan velli. sóðalegt jafnvel.
á heimilinu ríkir annars almenn tilhlökkun fyrir komandi æfingatímabil jólaævintýris.
jíbbí, gaman,gaman, dönsum allir saman, kátir eins og kettir á kló.. | fangor 13:46
